Мобингот е специфична форма на однесување со што се загрозува менталната или физичката состојба на работникот од страна на менаџментот или од другите вработени. Терминот „мобинг“ вклучува какви било малтретирања на работното место, сексуално, физичко или морално омаловажување, игнорирање, озборување... Причините за вакви лоши меѓучовечки односи и слабата комуникација може да се поради различна верска припадност, завист меѓу колегите, изживување врз вработените поради некои лични проблеми, несогласување во мислењата и многу други. Луѓето, пак, се подготвени на голема толеранција само за да го задржат своето работно место.
Истражувањата што беа спроведени во некои земји ги дадоа следните резултати:
- Во САД секој четврти работник е изложен на мобинг.
- Во Велика Британија секој осми работник.
- Во европските земји околу 15 отсто од вработените се изложени на мобинг.
Најголема изложеност на мобинг имаат вработените во државната управа и одбрана (14%), образованието и здравството (12%), а потоа следи хотелиерството (12%) итн. Во поголемиот дел од европските држави терминот „мобинг“ е особено познат, за разлика од кај нас, каде што ситуацијата е сосем поинаква. Во моментов единствена држава каде што мобингот се смета за криминал е Шведска.
Какви видови мобинг постојат?
Мобингот може да се подели на хоризонтален и вертикален. Хоризонталниот мобинг се јавува меѓу работниците кои се на иста положба во хиерархиската организациска структура, а е предизвикан поради чувството на завист, љубомора и желбата да се елиминира некој од колегите, бидејќи постои верување дека со тоа тие ќе напредуваат во кариерата. Вертикалниот мобинг се однесува на ситуации каде што претпоставениот злоупотребува еден или повеќе од подредените работници.
Кога се сомневате дека сте жртва на мобинг?
Чувствувате дека не можете да дојдете до збор од вашите колеги или од претпоставените. Постојано ве прекинуваат кога сакате да се изјасните. Тука станува збор за напад врз можноста за соодветна комуникација. Изолирани сте, никој не ви се обраќа, сите се однесуваат како да не постоите, ве оддалечуваат од вашите колеги, не сте поканети на заедничките состаноци и прослави. Во овој случај нападната е вашата можност за одржување на општествените односи. Сте слушнале глас за себе што е далеку од вистината и вашите колеги ви се смеат зад грб - вашиот углед е нападнат. Постојано ве навредуваат и се жалат на вас, го следат секој ваш чекор, ве казнуваат, не ви даваат работни задачи – го напаѓаат вашиот квалитет во работата. Вие не добивате пауза, ниту одмор. Некој се заканува дека ќе ве истепа. Сексуално сте злоупотребени. Со сето ова е нападнато вашето лично здравје.
Ако се пронајдовте во некоја од овие реченици, за жал вие сте жртва на мобинг. Пред да паднете во депресија и да се обезвреднувате себеси, обидете се да застанете цврсто на нозе и борете се против оваа ситуација. Бидете сигурни да имате докази за настанатото мобирање. Ако сте жртва на мобинг и сакате да ставите крај, контактирајте со некој од властите и некои организации што се занимаваат со овој проблем. Не дозволувајте никој на каков било начин да го загрозува вашето здравје или да ви ја разнишува самодовербата. Со среќа!
Повеќе содржини од денеска - ТУКА.